Für die ganze Seite gilt (C) by Ingrid

Nur ä ganz bsundri "Liebi", hed diä Gedankä verdiänt.....!!!! Also kopiärid nid eifach diä Gedankä!!!!

Ti amo tanto - Amore MIO!!!

ZYT, STUNDÄ, TÄG, MÖNÄT, JAHRE.....

Tag ii, Tag uus läb ich amä Ort wo ich mich nümmä richtig dähäi und wohl fühlä. Läbä i Tag inä, und hoffä dass är schnell durä gahd, und ich eventuell MIN Schatz cha gseh, aber d'Stundä gönd amä eifach nid umä, wenn ich de aber bim Schatz bi, rast Zyt nur so dävo! Stundä wo ich z'totschlaa und de wieder Stundä wo ich am liebschte nid wür la verbi rasä, d'Uhrä wo ich am liäbschtä umstellä wür,
dä Kaländär am liebschtä wägrüährä, dass miär Zyt nümm cha is Aug stächä. Träumend chönt ich dich gspührä, dini warm Hand fühlä, wür dich ghörä flüschtärä-nur drü Wort.... Drum würd ich am liebschte nur nu schlafä, wils ja doch nur äs Wartä isch wenn ich wach bi, bis ich dich wieder cha gseh. Wenn du wieder bi miär wärsch, chöntsch du mich zärtlich, sanft und lieslig ufweckä und ich chönnt äs paar Stündli gnüssä und de wieder iischlafä, bis zum nächschtä Mal!!!!

Verlang niä vo öppäräm, är sell d'Stärnä zellä, är chas nid; äs sind z'vieli! Verlang niä vo dä Sunnä, sie sell immer schiinä, sie cha das nid; denn äs gid d'Nacht! Verlang niä vo miär, ich müäss dich vergässä, ich wür das niä chönnä!

Ich ha scho so mängisch dänkt, äs wär so schön, wänn mär chönti d'Stärnä vom Himmäl holä, um sich ä Traum z' erfüllä?! Abär sie hangäd glaub viel z'höch...! Doch geschter han ich mich zuäfällig am Himmäl entgägä gstreckt, und ä Stärn isch miär i mi Hand ghied. Är isch nu warm gsi, und hed miär zeigt, dass Träum vielleicht nid sofort in Erfüllig gönd; aber irgändwänn mal...

D'Hoffnig trägt mich durs Läbä,
übär Flüss und Seeä. Sie isch dä Fadä, wo mich durs Läbä füährt. Was würd ich machä, wenn ich diä Hoffnig nid hätt?
Ich würd ertrinkä, wil ich ohni sie nid cha schwimmä. D'Hoffnig läbt i miär drinnä, und würd sie stärbä, wür au ich stärbä.

Ich sehnä mich nach dinärä Schultärä, wo ich immer cha aa lähnä.
Ich sehnä mich nach dinä Händ, wo mich immer so sanft streichlid.
Ich sehnä mich nach dim Arm, wo mich beschützt.
Ich sehnä mich nach dinä Lippä, wo mich immer so zärtlich küssid.
Ich sehnä mich nach dim Muul, wo miär seid ti amo tanto Chlini.
Ich sehnä mich nach dem Mänsch, wo mich so liäbt, wiä ich bi.
Ich sehnä mich nach dir, nur nach diär!!!

Ä churzi Ziit i mim Läbä, abär wiä ä Blitz hed sie igschlagä. Ha mich nid chönä und wellä wehrä dägägä,
sie hed mich gfangä. Himmelhoch, Ängäl jauchzänd,
Härzchlopfä überall. Rundum glücklich wiä imä Traum. Alläs isch andärsch nach derä churzä Ziit. Ich haltä mich a ihrä fescht, will diä Ziit nümmä verlüürä. Wirdä um diä Ziit kämpfä, dass sie niä ablauft! Jedermanns Glück chund irgendwänn, und mis isch etz vielleicht cho. Was düschter gsi isch, isch etz hell! Ich bi verändärät, än andärä Mänsch, denn alläs isch guät, ä wunderschöni Ziit!! Wo ich niämeh will missä!!! Und immer wirdä gärn a diä Zyt zrugg dänkä!!

Wo ich dich gseh ha, han ich Angscht gha, dich kännä zlernä.
Wo ich dich kännt ha, han ich Angscht gha, dich z küssä.
Wo ich dich küsst ha, han ich Angscht gha, mich z verliäbä.
Und etz, wo ich dich liäbä, han ich Angscht, dich z verlürä!!!!
I minä Augä gseh ich immer dis Bild, mis Härz rüäft immer di Namä und i mim Chopf bisch immer nur DU! D'Augä vo miär liäbäd; dis Gsicht, d' Händ; dini Huut, d'Lippä; dis Muul, d'Nasä; di Duft, d'Ohrä; dini Stimm. Mi Körpär liäbt; dini Wärmi, ich; liäbä dich! Und ich weiss, dass äs diär genau so gahd!!!
Liäbsch du d Ruäh, dänn liäb nid mich, denn äs gid viel ruhigeri Frauä. Liäbsch du d Friiheit, dänn liäb nid mich, denn ich wür dich niä meh fry gäh. Liäbsch du d Unkompliziertheit, dänn liäb nid mich, denn äs gid nu viel unkomplizierteri Frauä. Liäbsch du d Schönheit, dänn liäb nid mich, denn äs gid 1000 Schöneri für dich, - aber liäbsch du d Liäbi, dänn liäb nur mich, denn es gid keini wo dich so liäbt wiä ich!! Und du hesch dich im Momänt für d Liäbi entschiedä, also muäss ich nid dra zwieflä, dass äs irgend öppis gid, wo du meh liäbsch, oder diär meh Wärt isch. Nid mal d Ruäh, nid mal d Friiheit, nid mal d Unkompliziertheit, nid mal d Schönheit, nei du liäbsch d Liäbi-MICH viel meh!!

dä Alltag schliicht mängisch wiä ä Feind zwüschä zwei Verliäbtä und suächt än Verbündätä.
Är versuächt, alläs um ihn umä inäs Grau z'färbä! Doch s'Füür i mim Härz, das heiß i miär brännt,
und üs verschmelzä lad, färbt üsi Liäbi bunt. Mis Härz schlad Purzälbäum, wenn miär üs vo Tag zu Tag nüü begägnid, wänn Du miär so zärtlich id'Augä luägsch und seisch, wiä sehr du mich liäbsch.
Du bisch mis Läbänselixiär, min Läbänstrunk, nach dem ich süchtig bi! Äs git kei grauä Alltag,
nur Dich und mich und üsi groß, unändlichi Liäbi!!!!
Mis Läbä wär vielleicht eifachär ohne dich - äs wär aber nid mis Läbä...!!!!!!!!!!!

Wiä än ritt zum Mond - und früähstückä im Himmäl - dur roti Mohnfäldär springä -
und gälbi Sunnäbluämä pflückä - wiä än Summärtag am Meer - wiä
uf äm Rägäbogä spaziärä.
Ja, so isch äs mit Diär!
Du bisch für mich wiä d Sunnä, ich ha ä liächti Summerbrüni uf dä Huut ....!

Liäbi isch...
... wänn ich Znacht nid ischlafä cha, wil sich d'Gedankä nur
um Dich dreiäd.
... wänn ich jedä Tag mit Freud erfüllt bi, diä Freud uf üsäs
nächschtä Wiedärsehä.
... wänn's afad i mim Buuch kribblä, sobald Du mich küssisch.
... wänn ich pausälos vor mim Händy sitzä und uf äs sms vo Diär
wartä.
... wänn sich min (Gedankä-)Wortschatz uf 'Oh Mann' 'Mmhh...'
'Brrr...','Mamamia' und 'Hilfe' beschränkt, sobald Du i minärä Nöchi bisch.
... wänn ich am Abig ufäm Balkon sitzä und hoff Dis Spiegälbild i dä Stärnä
z'erkännä.
... wänn ich süchtig nach schlafä bi, nur um vo Diär träumä z'chönnä.
... wänn mis Härz Luftsprüng macht, wänn ich a Dich dänkä.
... wänn ich am liebschtä jedi Sekundä mit Diär verbringä würd.
... wänn ich Dich vermissä, sobald Du gahsch.
... wänn ich nur nu am Lächlä bi vor Glück.
... wänn mich dä Gedankä, Dich a minärä Sytä z'ha, glücklich macht.
... wänn ich miär äs Läbä ohni Dich nümmä cha vorstellä.
... und wänn Du zum Sinn vo mim Läbä wordä bisch!!!!!!!!!!!!!!!!!!!!!!!!!!!!!

S'Läbä isch eigentlich wiä äs Theaterstück ohni
vorhärigi Theaterprob. Drum sött mär lachä, tanzä, liäbä und läbä
jedä einzelni Augäblick, bevor dä Vorhang zuä gahd und s'Theaterstück
ohni Applaus z'Änd gahd.

Ich liebä dich.
Was bedütät das scho...? Äs sind nur drü eifachi Wort, Wort wo
ausdrückä sölläd, wiä wichtig du miär bisch.
Aber äs gid nüd wo zeigt, wiä sehr ich Dich liäbä, wiä sehr du miär
fählsch. Niämär kännt Tränä vo miär, wo nach diär rüäfäd, wenn Du nid da
bisch. Und äs gid nüd wo zeigt, wiä oft ich a dich dänkä und miär wünschä
dich niä meh müässä loszlah. Äs gid au nüd, wo d'Sehnsucht nach diär usdrückt, und wiä sehr
ich dini sanft, vertruuti Stimm, dis liäbä Lächlä und din Duft vermissä.
Nüd cha das beschriibä, au nid diä drü Wort. Ich wills diär
andärsch zeigä, was ich fühlä, denn diä Wort, was sind diä scho? Nur
Wort, wo jedä sägä cha. Ich will diär diä wahrä Gfühl zeigä. Und diä
gönd wiit über's "ich liebä dich" usä!!!!!

Mängä Schmärz isch so gross, dass d'Augä keini Tränä meh chönd vergiässä ... sondern nur s'Härz still und liislig blüätät...
Vielleicht isch üsi Liäbi kompliziärt, aber sie isch alli Mühä vo derä Wält wärt!!!!!!

Du bisch miär frömd gsi,
wo miär üs kännä glernt hend.
Trotzdem simmer ä Art vo Kollegä wordä...

...Aber – dini Augä,
dini Art miär gägänübär,
das isch kei Art meh gsi wiä ä Kolleg.

Mis Härz, miini Augä,
sie hend sich zersch gwehrt,
hend Angscht vor dä Liäbi gha,
wo so nüü gsi isch für mich.

Doch dini Geduld,
dini verstecktä Geschtä,
dini liäbivoll Art,
dis süässä Lächlä, diä schönä SMS, und s knackä anärä härtä Nuss,
hend dä Bann brochä.
und s'füährt üs jetzt inä unbeschriiblichi Glückswält.

Nur äs churzäs Lächlä vo diär und dä Rägä wird verschwindä.
Ich chas chum glaubä, näbä miär stahd ä Ängäl und erreicht mis Härz.
Nur äs churzäs Lächlä vo dem Ängäl und mis Härz fahd a lachä.
De Ängäl seid: ti amo.
Ich luägä de Ängäl aa und verliäbä mich immer meh und immer wieder ufs nüüi.

Ich gibä diär mi Liäbi, das isch alläs, wo ich will.
Jedäs Mal wenn ich dich ghörä oder gseh,
fahd mis Härz a lachä.
Du öffnisch mis Härz und du gsehsch,
d'Liäbi wo ich i miär ha. Ich bi einsam und verlorä gsi, bis du zu miär cho bisch.

Ich ha nid gwüsst, dass sich Liäbi so guät afühlä cha.
Das ich so öppis Schöns wiä Dich jemals aa triffä.
Mit diär würd ich mis Läbä wellä teilä,
denn du wärsch dä wichtigscht Mänsch für mich.
Dich würd ich liäbä, und würd versuächä all dini Träum z erfüllä.
Denn du bisch än Ängäl.

Wiä ä Sunnästrahl vo dä ufgehendä Sunnä - bisch du i mis Läbä trätä.
Und plötzlich isch alläs hell, so klar, so warm, so liächt wordä.
Solang's Dich gid, wird's immer Summer sii.
Verwirrend schön!!
Ich dankä Diär.
Ich hoffä, dass niä dä Näbäl wird cho, denn wänn dä chund, dringt nüd meh
durä - weder d'Sunnä am Tag, nu d'Stärnä vo dä Nacht! Denn dänn, wär dä schön
Summer z'änd.
Und Tränä würdäd uf minä Baggä gfrührä...!!
Vo dem Rusch und derä tüüfä Zfriedähäit, würd ich am liäbschtä än Teil konservierä,

damit dä Wintär nid so härt, lang und beschwährlich würd.

Was mär liäbt, muäss mär frii lah...
Chunds zrugg, dänn ischs ällei diis...
Chunds nümmä zrugg, dänn heds diär niä ghört!

Gib niä uf... wänn öppis im Wäg stahd.
Lauf nid wäg... wänn Angscht hesch.
Verschliäss Dich nid... wänn Du redä wettsch.
Läb das was Du fühlsch... und lah Träum niä la stärbä!!!!!

Äs wär weniger schlimm, diä wahri Liäbi nid z'kännä, als sie nid chönä fescht z'hebä.....!!!!!!!!

Das isch ä SMS-Spruch, wo miär sehr guät gfallt:

Eines Tages fragte die Liebe die Freundschaft: Für was bist du da wenn ich schon da bin?

Sie antwortete: Um ein Lächeln zu bringen wo du eine Träne hinterlässt!

Schänk miär nid din Blick,
sondärn la sie immer tüüf i mich inä streifä.
Schänk miär nid dis Härz,
sondern la mich drinnä wohnä.
Schänk miär nid dini Seel,
sondern la mich sie ergründä.
Schänk miär nid din Körpär,
sondern la mich nä gspürä.
Schänk miär nid dini Wärmi,
sondern wärm mich uf, wänn ich frührä.
Schänk miär nid dini Liäbi,
sondern la mich sie gspührä.
Schänk miär nid dis Läbä,
sondern la mich dra teilnäh. Von (C) Brigida

Än wunderschöni Ziit hend miär dörfä zäme verbringä.
Niä isch`s Lachä und s`gmäinsämä Blödälä z`churz cho.
Üsi Liäbi isch so starch gsi,
miär hend üs niämeh wellä losla....
Mängisch macht dä Läbäswäg Kurvä
wo mär nid cha vorusgseh.
Ich ha gmeint, ich känni dich scho guät,
abär äs isch alläs andersch cho.
Es isch komisch etz äso müässä z`dänkä.
Ich würd gärn numä diä schönä Ziitä im Härzä ha.
Aber äbä...
Du hesch äs diär so eifach gmacht
und miini Gfühl derbii ganz vergässä.
Ich ha wirklich gmäint ich känni dich,
und ha däbi dr Wahrhäit verbii gluägt.
D`Liäbi cha so starch sii
dass sie eim fascht blind macht.
Au wenn du meinsch du chasch miär usäm Wäg gah;
ich wird a jedem Ändi stah und diär id Augä luägä.
Und irgendwänn wirsch du miär än Antwort schuldig sii.
Weisch....
Hinderniss sind nid da zum vor ihnä stah z`bliibä
sonder um sie z`bewältigä!!!!!!!!!!

So sachlich, so nüächtärn
wänn du schriebsch.
Bisch du das wirklich
oder bisch du's nid?
So ruhig, glassä
a Faktä orientiärt.
Isch das dis Wesä
oder verstecksch du's eifach?
Bisch je us dem Ganzä
mal usbrochä?
Bisch richtig zornig gsi und
hesch Ärdä grochä?
Bisch je sowiit grännt
wiä's nur gahd,
bis dini Lungä brännt hed.
Hesch du das je erläbt?
Bisch du jemals so truurig gsi,
dass du dis Härz chlopfä gspührscht hesch.
Jedä Schlag, wiä wänn än Dunnär
dis Innäri berüährt?
Hesch du jemals so glittä,
hesch ufghört z'funktioniärä.
Nüd gässä, nüd trunkä,
als ob nüd meh z'verlürä hesch?
Hesch du die intensivä Gfühl scho jemals gspührt?
D'Ärdä, dä Himmäl, d'Höll berüährt?
Hesch du das jemals erläbt?

Wenn nid, hesch du nu niä gläbt und ghörig gliäbt! Ich has erläbt, einigi Täg!